Astana International Exchange («AIX», «Биржа») AIX Қазақстан Республикасы Қаржы министрлігінің Қытайдың ішкі капитал нарығындағы алғашқы егемендік панда-облигацияларының сәтті орналастырылғанын хабарлайды. Бұл маңызды мәміле Қазақстанның халықаралық борыштық капитал нарықтарындағы қатысуын кеңейтудегі маңызды қадам болып табылады және қаржыландыру көздерін әртараптандыру мен жаһандық өтімділіктің жаңа пулдарына қолжетімділікті кеңейту стратегиясының нәтижесінде жүзеге асырылды.
Егеменді облигациялар шығарылымының көлемі 3,4 млрд юань, айналым мерзімі 3 жыл, купондық мөлшерлемесі 1,90%. Орналастыру Қытай институционалдық инвесторлары тарапынан ерекше жоғары сұранысқа ие болды: сұраныс шығарылым көлемінен екi есе артып, нарықтың Қазақстанның егемендік кредиттік профиліне және елдің ұзақ мерзімді экономикалық келешегіне жоғары сенімін көрсетті.
Листинг Пекин қаржылық активтер биржасында және AIX алаңында өтті, бұл Қазақстан мен Қытай арасындағы қаржылық байланыстардың одан әрі дамуына ықпал етіп, капитал нарықтары саласындағы екіжақты ынтымақтастықты нығайтты. Қосарлы листинг екі нарық арасындағы интеграцияның күшеюін айқындап, трансшекаралық инвестициялар мен ұзақ мерзімді қаржылық өзара іс-қимылды дамытуға бағытталған ортақ ұстанымды білдіреді.
AIX Басқарма төрайымы Асель Мұқажанова былай атап өтті:
«Қазақстан Республикасы Қаржы министрлігінің алғашқы егемендік панда-облигацияларының орналастырылуына қатысқанымызды мақтан тұтамыз. Қытай институционалдық инвесторлары тарапынан жоғары сұраныс Қазақстанның макроэкономикалық көрсеткіштеріне және егемендік кредиттік профилінің сапасына деген халықаралық сенімнің артқанын көрсетеді. Beijing Financial Assets Exchange және Astana International Exchange алаңдарындағы қосарлы листинг нарықтар интеграциясының өсуін көрсетіп, AIX-тің аймақтық және халықаралық капитал ағындары арасындағы байланыстырушы буын ретіндегі рөлін растайды. Бұл мәміле эмитенттер мен инвесторлар арасындағы екі нарықтағы өзара іс-қимылды кеңейтуге және болашақ трансшекаралық шығарылымдарың негізін қалайды деп санаймыз».
Шығарылымды жетекші букраннер әрі андеррайтер ретінде China International Capital Corporation, бірлескен букраннерлер әрі андеррайтерлер ретінде Industrial and Commercial Bank of China және China Construction Bank Corporation, сондай-ақ жергілікті лид-менеджер ретінде Teniz Capital Investment Banking жүзеге асырды.